價錢：Agoda$445（連稅）/1晚
房型：逸雅
地址：彌敦道380號
最早入住時間：15:00
一般退房時間：12:00
有睇開我post既朋友仔都知我成日去彌敦酒店，今次決定試下位置正正喺彌敦隔離既逸東酒店啦～ 上網見到呢間酒店既風評都唔錯，同彌敦價錢都好接近！同埋成日經過都會見到有人係門口派傳單，但因為無望得太仔細，所以一直都以為只係一間餐廳，check in當日先知原來呢間就係逸東⋯😂
酒店門口既擺設好特別！見到草泥馬即刻心心眼😍 好cute！
酒店底層有food hall，由十幾間不同特色店鋪匯聚而成既美食廣場，最近進駐新品牌包括「鰹烏冬」、Churros專門店「Twist & Buckle」及主打牛扒的The Meat Co.。酒店亦會定期推出不同主題既自助餐plan，例如任食生蠔、燒烤主題、甜品下午茶⋯⋯等等，有興趣既朋友可以留意一下！
登記：
當日check in已經係晚上九點後（仲要係閒日），所以唔洗排隊係好正常😂 不過見到佢地長期都至少有四位或以上職員喺前台stand by，推算假期既等候時間應該都唔會太長。
辦理過程十分快捷，雙方出示身分證、然後scan QR code填寫健康申報表，再繳交$500按金後就可以入住。
✅若使用泳池要提早向職員預訂
📌臨上房前有段小插曲，我地check in之後經側門行返出室外，行去另一邊等lift上房時突然響警鐘，隔咗一陣見到酒店主管同消防員交涉中。於是另外有位職員同我地講唔需要擔心，今次係因為有客人沖涼無開到抽氣扇所以觸動咗警報(？) 我聽完都打咗個突⋯🤯
房間：
上到房先知係家庭房，仲聽到隔離房傳出既電視聲，感覺上好似無乜私隱咁⋯只好祈禱半夜唔會聽到呻吟聲。🤫
房間比較殘舊而且比預期中細，仔細望會見到床頭木板都有崩裂痕跡、油漆脫落既情況。
床褥偏硬，我個人黎講唔中意訓太軟既床褥（會腰體痛😢），所以床硬反而訓得仲舒服～但係枕頭真係太「薄」，要兩個枕頭疊住一齊先較舒適。
🔌床頭只有插頭位，沒有USB
✅有提供雪櫃，水煲及咖啡、茶包
✅床頭有放置鬧鐘
❌沒有樽裝水提供
浴室：
✅已配備牙具、沐浴露、洗髮水、即棄拖鞋
✅沐浴露同洗頭水都係檀香味，聞落好香💓
其實一開始見到個廁所，仲滿意過出面間房😂 但硬件設備上真係有待改進，可能酒店真係需 次大翻新⋯⋯
❌水溫極之不穩定、時凍時熱，
❌花灑水壓較低，水力唔夠
❌風筒都出現唔夠力既情況，長頭髮吹咗15分鐘
（5星為最高分，空白=不予置評）
乾淨度：
房間好大塵，入到去已經忍唔住連打幾個乞嗤🤧 書枱、床頭木板位都佈滿哂塵，旁邊既白色透明膠櫈基本上已經花到可以用「體無完膚」黎形容，有數不盡既指模同污漬。
交通度：⭐️⭐️⭐️⭐️⭐️
佐敦地鐵站一出直行5分鐘左右就到達酒店，亦近廟街一帶，地理位置方便。
✅酒店food hall已有多款特色餐廳可選擇，中餐、西餐、泰國菜、越南菜⋯應有盡有。
🍜樓下有一風堂、斜對面就係Starbucks。
性價比：⭐️⭐️
若以價錢黎講，四百蚊一晚其實好划算，但衛生問題迫切需要改善。
整體：⭐️⭐️
總括而言今次體驗幾失望，估唔到lobby咁靚、而且咁有規模既大集團會敗在衛生清潔方面。加上位置正正喺彌敦對面，令人好難唔將兩者比較。
今次體驗可能只屬於個別例子，純粹係我唔好彩⋯😂 但公平啲講，其實網上見到住客對呢間酒店都有良好既feedback，而且有部分已翻新既房型望落真心唔差。
Comments