價錢：Agoda$474（連稅）/1晚
房型：W Room
地址：旺角廣東道1131號
最早入住時間：14:00
一般退房時間：12:00
登記：
-需雙方出示身分證、填寫健康申報表後，再繳交$500按金便可入住。
傍晚5、6點左右嚟到酒店check-in，可能由於平日關係周圍都好靜，基本上出入都見唔到有其他住客，所以整個入住過程都好迅速。
1樓登記處環境十分寬敞，除咗有免費咖啡供應外，隔離有三部電腦可供客人上網。
另外仲有一部自動販賣機，夜晚可以落嚟買下零食同飲品～👍🏻
房間：
入到房見到張床咁”摷”覺得好奇怪，因為望落去個感覺就好似啱啱有人坐過落去咁⋯😅 尤其係被邊位，皺到摺埋哂一舊舊咁好核突⋯⋯
床方面軟硬度適中，但枕頭真係好薄～
薄到就算將兩個枕頭疊起嚟訓都於事無補。
房間有兩個長身儲物櫃，上半部分擺放衣物，而下半部分就一個櫃放雪櫃、保險箱，另一個櫃就放微波爐同DVD機。（對於我呢種晚晚食宵夜嘅人來講，半夜三更可以有個微波爐比我叮嘢食實在太方便～加分加分！！🥰）
玻璃枱上面放咗張menu紙（但張A4紙摷到好似喺垃圾桶拎出嚟咁😅），可以直接叫嘢食上房，餐單上亦有標明係即叫即整。
因為有送餐服務嘅關係，房內餐具都比較齊全，有齊哂碗、筷子、匙羹⋯等等。
🔌只有插頭位，沒有USB充電
✅設有水煲&茶包、微波爐、雪櫃、及DVD機
✅提供兩支樽裝水 ✅有兩張櫈仔，兩個人食嘢比較方便👍🏻
浴室：
-已配備牙具、沐浴露、洗頭水、護髮素、潤膚乳液、梳、拖鞋
沐浴用品準備齊全，而且沐浴露係同帝京酒店用緊同一隻牌子！🤩 帶點酸酸甜甜嘅檸檬草香，聞落真係好fresh、好醒神～🍋
✅花灑好夠力，水溫穩定👍🏻
✅風筒係VS負離子風筒
❌磚牆出現崩痕，比較殘舊
❌企缸地面有好多清洗唔到嘅污跡同花痕
（5星為最高分，空白=不予置評）
乾淨度：⭐️⭐️⭐️⭐️
雖然見到好多地方都有點殘舊，除咗某幾個位置發現到一啲「歲月痕跡」外，其實講真，間房又真係唔污糟喎⋯
至少檢查過餐具，壆位、鏡、枱面等等，都係抹得好乾淨，亦都唔見有污跡。
但就衰咗喺個企缸地板度，因為實在花得太離譜。
交通度：⭐️⭐️⭐⭐
酒店位置正正係豪華戲院(現已清拆)後面，由旺角快富街出口行過去大約只需10分鐘路程。附近多食肆，無論行去油麻地、旺角、或大角咀都好方便。
儘管酒店處於鬧市地段，但仍旺中帶靜。
性價比：⭐️⭐️⭐⭐
今次預訂撞正假期前夕，房價可能微微漲升咗少許～其實平時喺Agoda見到呢間酒店價錢平日大概$380-$450左右，價錢合理、環境舒適。
整體：⭐️⭐️⭐⭐
整體而言今次體驗感覺不錯，下次會再回頭的。
Comments